Назарбаев Зияткерлік мектебінің түлектері қайырымдылық акциясын бастады (+ВИДЕО)

Жылыойлық жастар әлі бірнеше отбасыға көмек көрсетуді жоспарлап отыр

Атыраудағы химия-биология бағытындағы Назарбаев Зияткерлік мектебінің бір топ түлектері аз қамтылған отбасыларға көмек көрсетті. Құлсарылық Әлішер Бектілеу мен Ернар Көбегеновтер аудан орталығында тұратын көпбалалы отбасына азық-түлік таратты.

«Елімізде індет етек жайды. Экономика күрделі қиындықтарды кешуде. Сондықтан біздер, қолдан келгенше елімізге, жұртымызға демеу болуымыз үшін осындай челлендж бастадық. Өзіміз тұрып жатқан ауылда әлеуметтік көмекті қажет ететін отбасылар көп. Әрі қасиетті Рамазан айында сауапты іс жасау үшін бүгін біздер жалғызбасты анаға бір айға жететін азық-түлік өнімін алып бердік», - дейді Әлішер Бектілеу.

Жыл басындағы статистикалық деректерге сүйенсек, Жылыой ауданының орталығы Құлсары қаласында 55 742 тұрғын тіркелген. Олардың мыңнан астамы ресми аз қамтылған отбасылары санатында. Әлеуметтік осал топтағы жандарға атаулы жәрдемақылар тағайындалған және мемлекет тарапынан көрсетілетін көмек те зор. Десек те, жастардың осындай қайырымды іске бастамашыл болуы олардың азаматтық қоғам құрудағы өзіндік қадамы.

«Мен бірнеше жыл бұрын Атыраудағы Назарбаев Зияткерлік мектебін үздік бітірдім. Кейін оқудағы жетістіктерімнің арқасында Германияның озық жоғары оқу орнына түстім. Студент болсам да ата-анама салмақ түсірмей, жиған-тергенімді пайдалы іске жұмсағанды жақсы көремін. Сондықтан Әлішердің ұсынысын жерге тастамай қолдау көрсетуге келдім», - дейді Ернар Көбегенов.

Елімізде бастау алған «Біз біргеміз!» жалпыұлттық қозғалысы аясында жылыойлық жастар әлі бірнеше отбасыға көмек көрсетуді жоспарлап отыр. Акцияның алғашқы күнінде олар бейнетаспа арқылы өз замандастарына үндеу тастады.

Мәліметтер мектеп баспасөз қызметімен ұсынылды

ФОТОГАЛЕРЕЯ

Біріңғай мемлекеттік байланыс

AqPrint

Байланыс номерi :     +7 702 132 03 32      +77122458521