Наурыз - көктем мен жаңару мерекесі.
Наурыз айының 14-інен басталатын Көрісу мейрамының жергілікті тұрғындар үшін орны бөлек. Осы орайда Жылыой аудандық мәслихат депутаты Халелова Ақмарал Самиғоллақызы ауданымыздың Ақкиізтоғай, Шоқпартоғай, Қосшағыл, Жаңа Қаратон, Тұрғызба ауылдарын аралап, жалғызбасты ата - әжелерімізге көрісіп, қал-жағдайларын сұрап, сый-сияпатын табыстап, әңгімелерін тыңдап қайтты.
Елімізде болып жатқан індетке байланысты көптеген іс-шаралар қашықтықтан өткізілгенімен, ұлттық құндылығымызды және салт-дәстүрімізді бұл ісімен жастарға үлгі ретінде көрсету маңызды. Халық қалаулысы үлкендерден бата алып, көңілдерін көтеріп қайтты.
Адамның өмірінің мәні мен сұлулығы, адамның келешегіне сенімділігі - баланың ата-анасын ардақ тұтып, өзінің перзенттік парызын бір сәтке де есінен шығармауында. Үлкендіктен ешкім құтыла алмаған. Бірақ кәріліктің өзінің сәні-мәні бар. Қарт кісіні құт-береке деп танысақ, ол - ұрпақ көрегендігі. Ұрпағы құрметтеген ата-ана әркезде де бақытты.
"Жылыой-ақпарат"
