Қасиетті Рамазан айының ішіндегі түндердің ұлысы болған Қадір түнін қарсы алу үшін жылыойлық жамағат та қас қарая Құлсары қаласындағы аудандық орталық мешітке қарай ағылды. Ауызашар беріліп, уағыз айтылып, түрлі діни-интеллектуалды ойындар ұйымдастырылды.
Тарихи деректерге көз жүгіртсек, дәл осы түні қасиетті Құран кітабы түсірілген. Сондықтан, бұл түні ерекше саналып, бір жылдық тағдырлар жазылады делінеді. Күллі періште атаулы жер бетіне түсіп, жасалған амалдар 1000 айдан да қайырлы деп есептеледі. Сондықтан сол 83 жылдық сауаптан үміт еткен жергілікті жамағат ақшам намазына таман мешітке жинала бастады. Ауыз ашып, парызын орындағаннан кейін мешіт асханасында 200 адамға дастархан жайылды. Көңілді күйде қауышқан жерлестеріміз бір-біріне ыстық лебізін білдіріп, бас имам Жасұлан Қуанышұлы:
- Бұл түн - ерекше кешірім мен мейірімге толы түн. Адам күнәсіне шынайы өкініп, тәубе етсе, Құдай тағала оның барлық күнәсін кешіреді. Хадисте: “Кімде - кім Қадір түнін иманмен әрі сауаптан үміттеніп, құлшылық жасаса, оның өткен күнәлары кешіріледі” делінеді. Ата-бабамыз: “Қасиетті түнді құрметтеген – өз өмірін құрметтеген” деп осы түнді ерекше қарсы алған. Сол дәстүрді сақтап, Қадір түнін барынша құлшылықпен, ізгі істермен өткізу – әрбір мұсылманның парызы. Қадір түні мүбәрак болсын! Алла тағала баршамыздың жасаған дұға-тілектерімізді қабыл етсін,- деп сөз бастап, насихат айтты. Ел үлкендері де сөз сөйлеп, жастарға ақыл-кеңесін жеткізіп, бірлікке шақырды.
Құптан намазы таянғанда мешітте ине шаншыр орын қалмады. Құдайдан кешірім тілеп келгендердің қарасы қалың. Қос қабатты мешіттің іші лық толы. Құптаннан кейін 20 ракағаттық тарауық намазы басталды. Бұл түні Рамазан айы басталғаннан бері қарилық қызмет қылып жүрген Ғалымжан Жұмажан ұстаз Қадір түні Құранның 30-шы парасын тәмамдады. Үтір намазын оқып болған жамағат ортаға жиылып, өзімізден шыққан қариымыз Ғалымжан ұстазды ортаға алып, алғысын жаудырды. Мешіт әкімшілігі оған арнайы шапан жапса, жамағат бас имам Жасұлан Қуанышұлы мен Ғалымжан Жұмажанға Түркия мемлекетіне бір апталық отбасылық саяхатқа жолдама сыйлады.
Іле-шала Қадір түніне арналған шаралар ұйымдастырылып, көптің көңілін тербеді. Мешіт ұстазы Демирел Сембаев та Қадір түні туралы уағыз айтып, қадір-қасиетін одан әрі аша түскендей әсер қалдырды. Жиылғандарға діни сұрақтар қойылып, интеллектуалды ойын ұйымдастырылды. Қатысушыларға арнайы сыйлықтар таратылып, ынталандырып қойды. Қадір түнін мешіттен қарсы алуға келген Жандарбек Ералиев:
- Қадір түнінің барша мұсылмандар үшін орны бөлек. Мешіттегі жамағаттың бір-біріне тек жақсылық тілегені жүрекке жылулық ұялатады. Бүгін білмегенімізді де біліп, жоғалтқанымызды да тауып, рухани азық жинадық. Барша жерлестеріме айтарым, тұтқан оразаларыңыз бен тілеген дұғаларыңыз қабыл болсын,-деп өз пікірін білдірді.
Таң сәріге дейін Алланың үйі жамағаттан босамады. Бірі құлшылық қылса, бірі құран оқып, дұға етіп жатты. Сәресі уақыты таяғанда мешіт асханасында 100 адамға арналған дастархан жайылды. Ауыз бекіткен жамағат таң намазын оқып, керемет көңіл-күйде үйлеріне тарқасты.
Иә, бірлік пен берекенің бастауы болған қасиетті Рамазанның қоғамға берер пайдасы зор. Тентекті тезге, жаманды жөнге салып, пенде баласын күнәлі істен тыятын жақсы айдың өзге айлардан құты басым. Оны Оразаға деген жылыойлықтардың пейілінен де байқадық.
