Өткен сейсенбі күні аудандық ішкі істер бөлімінің Теңіз кенішіндегі полиция бөлімшесіне ондағы біріккен кәсіпорынның қауіпсіздік бөлімінің қызметкерінен хабарлама келіп түсті.
Онда ТШО емханасына зауыттың өндірістік аймағындағы бір мердігер мекемеде еңбек етіп жүрген үш жұмысшысының дене жарақатын алғандығы туралы дерек келтіріледі. Олар емдеу орнына жатқызылып, шұғыл дәрігерлік көмек көрсетілген. Бөлімнің жедел тергеу тобы мәселенің мән-жайын тез анықтады. Үш жұмысшы түнгі сағат 03.47 минуттар шамасында Теңіз мұнай дайындау зауытының күкірт алаңында сұйық күкіртті құю кезінде аятарынан термиялық күйік алғандығы белгілі болды. Кейін облыстық Төтенше жағдайлар департаментінің таратқан ақпаратына сүйенсек, күні бүгін күйік шалған үш азамат та облыстық ауруханаға жатқызылған.
