Ел тарихын, мәдениетін білу – әрбір азаматтың міндеті.
Ал өткенді білмей болашаққа көз жүгірту мүмкін емес. Өткеннің ізін жаңғыртып, тарихтан сыр шертетін негізгі құрал бұл - музей. Екі дәуір арасындағы ұлы көпір десек те артық айтпағандық болар еді. Тарихи оқиғаларды санамызға сіңіруде музейдің рөлі орасан. Осы тұрғыдан Атырау гарнизоны әскери полиция бөлімшесінің бастығы, майор Бейбіт Сембекұлының бастамасымен біз де рухани сусындауға, ел тарихына, қала тарихына бір көз жүгіртіп, патриоттық сана-сезімімізді нығайту мақсатында, Атырау гарнизоны әскери полиция бқлімшесінің жеке құрамының қатысуымен Атырау облыстық тарихи-өлкетану музейіне үстіміздегі айда экскурсия жасадық.
Музейден тамыры терең тарихымыздан сыр шертетін түрлі құнды заттар мен өткенді айна-қатесіз бейнелеген көріністерден көп ой түйдік. Ішкі жан дүниеміз бен руханиятымыздың дамуына үлкен септігі тиді. Тіптен бойымызды бабалардың ерлігі, өрлігіне деген, жерді қорғаудағы, елді күзетудегі ерліктері мен түрлі сындарда мұқалмаған жігерлеріне деген риясыз алғыс кернеп тұрды.
Бақтияр Дәуренқұлов,
Атырау гарнизоны ӘПБ (әкімшілік тәжірибе) офицері әділет капитаны
