Жақын арада көпбалалы әке баспаналы болады.
Бұл блогердің мұқтаж отбасыларға 8-рет үй әперуі. Tengrinews.kz тілшісі Дәулет Төлеутайұлымен әңгімелесіп, қайырымдылық іс-шаралары туралы сұрады.
Қазіргі таңда Дәулет Төлеутайұлы - баспанаға бағыт беруші жетекші сарапшы маман.
"Instagram желісіндегі парақшамда оқырмандарым көбейген сайын, оларды жақсы жаққа жұмылдыру, қайырымдылықтың бір үлгісін көрсетуді қаладым. Қайырымдылық жасағанда ақша жинауды ұзаққа созбай, шамамыз жеткенше, 24 сағатта жинауды ұйғардық. Өзіміздің шамамызды байқап көрмек болдық. Баспана сыйлау қарашада алты баласы бар Асхат пен Гүлжахан деген жандардан басталды. Олар оған дейін вагонда тұрып жатқан", - дейді блогер.
Сол кезде Дәулеттің бастамасымен оның оқырмандары бір тәулікте 6 450 000 теңге жинап берген. Бұл сомаға олар отбасына үй сатып алып, кейін техникалық заттар алған.
