Таңғы жүгірісімен талайды ұйқысынан оятып, түрлі марафондарда жүлделі орындарды қанжығасына байлаған, ел Тәуелсіздігінің 30 жылдығы құрметіне 30 шақырым қашықтықты бағындырып, Құлсары мен Ақкиізтоғайға дейін желіп жеткен ауданға белгілі Әлібек Науаров басшылық қызметке тағайындалды. Ол таяуда Қазақтан Республикасы Президенті жанындағы Мемлекеттік басқару академиясын "Бизнес және басқару" магистрі бойынша үздік бітірген еді. Ал ондай білімді түлектер бір жыл ішінде конкурссыз-ақ басшылық қызметке тағайындалу мүмкіндігі бар.

Әлібек Қойшыбайұлы аудандық мәдениет, тілдерді дамыту, дене шынықтыру және спорт бөлімінің басшысы болып тағайындалды. Бұл жөнінде аудан әкімінің баспасөз қызметі хабарлады.

Ә. Науаров - білімі жоғары. Мемлекеттік қызметке дейін бюджеттік және жеке секторларда еңбек еткен. Кейін мемлекеттік қызметке ауысып аудан әкімдігінің, Атырау қаласы әкімдігінің баспасөз хатшысы, аудандық дене шынықтыру және спорт бөлімінің басшысы лауазымдарын атқарды.

Аудан әкімінің міндетін атқарушы Гүлнафис Айшуақова жаңа басшыны ұжымға таныстырып, қызметіне сәттілік тіледі.

Е.Қошақанов