Қосшағыл мәдениет үйінің ұйымдастыруымен «Қыз өссе - елдің көркі» атты арулар байқауы өтті.
Байқауға Құлсары қаласы, Жаңа Қаратон кенті және Қара-Арна, Тұрғызба, Қосшағыл ауылдық округтерінен ару қыздар қатысты. Байқау шымылдығын жүргізушілер Әлібек Амандық пен Оралхан Қарашаев ашып, байқауға төрелік ететін әділқазылар алқасын таныстырды. Әділқазылар алқасының құрамында Өнер мектебінің директоры, жастар жанашыры Г.Қалжанова, «Кең Жылыой» мәдениет үйінің жастармен және балалармен жұмыс бөлімінің әдіскері Ж.Нұрханова және «Кең Жылыой» мәдениет үйінің музыкалық жетекшісі, әнші А.Қоңыров болды. Байқауда сайыскерлер өзін-өзі таныстыру, салт-дәстүр туралы сұрақ-жауап бөлімдері бойынша жарысты.
Арулар кешкі көйлектерден сән үлгісін көрсетуден де бәсекеге түсті. Қазылар алқасының шешімімен Бас жүлдені Тұрғызба ауылынан келген Әйгерім Алдаберген иеленді. Ал бірінші орын Қара-Арна ауылынан келген Камила Құрманғазықызына бұйырды, екінші орынды Қосшағыл ауылының аруы Гүлжайна Атшығали еншілеп, үшінші орынды Құлсары қаласынан келген Перизат Сәбитова иеленді. Құлсары қаласының аруы Әсем Мәлікқызы «Көрермендер көзайымы» номинациясымен, Жаңа Қаратон кентінен келген Альбина Амангелдиева мен Тұрғызба ауылынан келген Шаттық Бисеновалар арнайы алғысхаттармен марапатталды. Барлық қатысушыларға гүл шоқтары мен бағалы сыйлықтар табыс етілді. Байқауда ауыл өнерпаздары Ф.Рамазанова, А.Қоянақова, О.Қарашаев т.б. жиналған көрермендерге мерекелік көңіл күй сыйлады.
Н.Бөлегенова, Қосшағыл мәдениет үйінің әдіскері
