Төтенше жағдай кезінде тұрғындар тек қана тасқын сумен емес, желдей ескен жалған ақпаратпен де теңдей күресті. Сол күндері қайда барарын білмей, бас сауғалаған жерлестеріміз қоғамдық штабтың қайырын аз көрген жоқ. Себебі, әкімдіктен өз мәселесіне нақты шешім таба алмаған жандар сонда барды. Материалдық та, әрі моральдық та зардап шеккен жұртты қабылдаған штаб мүшелері заңдылық, ақпараттық тұрғыдан көмегін тигізе білді. Өткен жылдың көктемінде тасқыннан зардап шеккен құлсарылықтарды қолдаған қоғамдық штаб басшысы Ерқұл Дәулетбаев сол кездерді үлкен тебіреніс үстінде еске түсіреді:
- Негізінен, тасқынның алдын алу жұмыстары жүйелі жасалмады деп есептеймін. Оған дәлел – нәтиже. Тасқыннан кейін де азан-қазан кезең болды. Әлеуметтік желілерде түрлі ақпараттар жүрді. Оның ішінде ақиқаты да бар, жалғаны да бар. Сол уақытта жергілікті атқарушы органның ресурстары су тасқынына қарсы жұмысқа бағытталып, тұрғындармен тиімді коммуникация мен түсіндіру жұмыстарын жүргізуге үлгермей жатты. Сондықтан, қоғамдық штаб құру туралы шешім қабылданды. Оның құрамына штаб басшысы, жастар көшбасшылары, сындарлы қоғам белсенділері, беделді кәсіпкерлер, ақпараттық жұмыс мамандары, заң және банк саласы бойынша кеңесшілер мен діни қызметкерлер кірді.
Ауданда алғаш 14 сәуір күні ресми түрде қоғамдық штаб құрылып, басшы болып бекітілдім. Содан әлі күнге дейін ақысыз қызмет етіп келеміз. Бастапқы кезеңде 33 адам болып, уақыт өте келе құрамымыз қысқарып қалды. Бас-аяғы 3741 тұрғынды қабылдап, заң аясында түсінік жұмыстары жүргізілді. Оның ішінде түрлі қиын жағдайға тап болғандар бар еді. Мысалы, бірінің үйі сот орындаушылар арқылы бұғатқа қойылса, бірі жалдап тұрады. Осындай мәселелерді шешу жолында қоғамдық штаб құрамындағылар еселі еңбек етті десем, артық айтқандық болмас,-деді өз сөзінде.
Қоғамдық штабтың жұмысын жоққа шығарғысы келгендер де көп болды. Дегенмен, нақты цифрлар мен деректерге көз жүгіртсек, шыны керек, біраз отбасыға пайдасы тиді. Мысалы, жалдамалы үйде тұратын кей тұрғындар дүние-мүлкінен айрылып, далада қалған болатын. Заң жүзінде үй иесі ғана ақшаны алуға құқылы. Осы жағдайды ескере отырып, қоғамдық штаб мүшелері ондай отбасыларды «Ерекше топ» деп есепке алып, далада қалдырмай, қаржылай және материалдық көмек беру мәселесін көтерді. Одан бөлек, сот арқылы шектеу қойылған 67 үйді заңгерлер арқылы босатып берді. Комиссия бағалаған сомаға келіспеген 814 отбасының да мұңын тыңдап, мәселесін шешу үшін бірқатар жұмыстар атқарылды. Үйдің құжатын рәсімдеп толық аяқтамаған жерлестеріміздің де мәселесін көтеріп, заңдық тұрғыда көмек көрсетіп, аянып қалмады. Эвакуациялық орындарды ұйымдастырып, ондағы тұрғындардың жағдайын біліп, тұрмыс-тіршілігімен танысып, күнделікті байланыста болды. Керек-жарақтарын барынша үлестіруге тырысты.
Иә, тасқын кезінде тосылып қалғандар аз болды. Туған ел үшін ештеңеден тайсалмай, барлық сынаққа қарсы тұрған жерлестер көп. Бірі бөгет басында қызмет етсе, бірі қоғамдық штабта қалалықтарға кеңес берумен айналысып, тағысын тағы әр сала өкілдері аянып қалған жоқ. «Бір жеңнен қол, бір жағадан бас шығарған» ауызбіршіліктің арқасында қиындыққа қарсы тұрып, алғы күннің жоспарын құрып, жарқын болашаққа қадам баса білдік. Көрген жаман түстей көрінген қорқынышты күндер енді келместің кемесіне мініп, Құлсарыға қайтып қайрылмасын деп тіледік.
Е.АХМЕТКӘРІМОВ
