Құлсары халқының басынан өткен былтырғы алапат тасқын әлі де жадымызда. Сол бір кездері қиындыққа қаймықпай қарсы тұрған жылыойлықтар тілсіз жаудың зардабын жеңіп шықты. «Жұмыла көтерген жүк жеңіл» дегендей, құлсарылықтардың қайғысын бүкіл қазақстандықтар көтеріп алды. Бұл ретте жан-жақтан ағылып келген гуманитарлық көмекті бірізділікке түсіріп, баспанасыз қалған жандарға қара қылды қақ жарғандай тең бөліп бере білу де кез келген жанның қолынан келе бермейтін игілікті іс. Міне, осы орасан шаруаны дөңгелентіп, басшылық еткен Жанаргүл Шарғабаевамен сұхбаттасудың сәті түскен еді.
- Жанаргүл Сағынбайқызы, бәрі қалай басталып еді?
-Тасқынның алдын алу шаралары қызу жүріп жатқан кез. Әлеуметтік желілерде арнайы чаттар ашылған. Бірінші бөгет тұрғызып жатырған жігіттерімізге көмектестік. Басында қапшық сияқты керекті құралдарды тараттық. Кейін қаламыз су астында қалып, тұрғындар жан-жаққа эвакуацияланды. Сол жұма күнгі түнде Теңіз қалашығына жерлестерімізді жеткізген кезде көңілдерінен мұң, көздерінен қорқыныш байқадық. Барынша басу айтып, қаласын қимаған тұрғындарды сабырға шақырдық. Сол кездері, тіпті, ұйқыны да ұмыттық. Дегенмен, ел баспанасынан безіп, үдере көшкенде, демалуды ойға да алмайды екенсің. Келесі күні нағыз гуманитарлық көмек келе бастады. Оны біз де күттік. Себебі, Теңіз кенішінде барлық жағдай жасалды десек те, үй киімдері, балалар жөргегі және дәрі-дәрмек сияқты күнделікті өмірге қажетті заттар тапшы болды. Сол кезде ТШО қызметкерлерімен біріге отырып, алғашқы гуманитарлық көмекті өзіміз жеткізе бастадық. Ең бірінші тікұшақпен Атырау қаласынан керек-жарақтарды алдырдық, қаладағы кәсіпкерлерден де сұраныс бойынша түскен аса қажетті заттарды сұраттық. Әсіресе, аудандық мәслихат депутаты Ризангүл Атинова өзінің дәріханасынан қажет деген дәрі-дәрмектің бәрін берді. Сөйтіп, Теңіз кенішіндегі еріктілер бар, мұғалімдер бар Теңіздегі гуманитарлық көмекті бір жолға қойдық.
-Құлсары қаласының өзіндегі гуманитарлық көмек қалай өрбіді?
-Шыны керек, қалада қиындықтар кезікті. Бірнеше рет алдымызды кесіп, келген көмекті басыбайлы етіп, алып қалуға ниетті жандар аз болған жоқ. Алғашында №1 және №18 мектептің ғимаратында басталды, кейін «Жадыра» мейрамханасына ауыстық. Соңында №7 мектеп ғимаратына тұрақтап, аяғына дейін сол жерде қалдық. Алғашқы күндері Серік Қамидолла басшы болып сайланып, жұмыс бірте-бірте қыза түсті. Алайда, денсаулығына байланысты Сәкең кетуге мәжбүр болып, жауапкершілікті өз мойныма алдым. Ақиқатын айтсақ, гуманитарлық көмек біздің ауданға өте көп келді және ол бір жолға қойылмады. Соның салдарынан әрқайсысы әр жерде талан-таражға түсіп кеткен кездері де кездесті. Біз еріктілермен біріге отыра, арнайы база жасақтап, көмекке мұқтаж барлық тұрғын қамтылуы үшін қолымыздан келгенді аянып қалмадық. Мысалы, гуманитарлық көмекті бір рет алған тұрғын екінші мәрте тек бір апта өткеннен кейін иемдене алатын болды. Бастапқы күндері қиындау болғанымен, кейін жүйелі жұмыстың арқасында жеңілдене бастады.
-Жалпы ауданға қанша гуманитарлық көмек келді және оны зардап шеккен тұрғындар түгел ала алды ма?
-Алматы облысынан 40 тонна азық-түлік пен киім-кешек, тұрмысқа қажетті заттарды Алматы кәсіпкерлік палатасы жіберді. Түркістан облыстық қоғамдық кеңестің ұйымдастыруымен 80 отбасына арнайы жасақталған ыдыс-аяқ, көрпе-көпшік әкелінді. Атырау қаласынан 1600 тонна, бас-аяғы әр қаладан келген көмекті машинаның санымен айтсам, 20 шақты «Газель», 18 фура мен «Камаз» гуманитарлық көмек келді. Жалпы саны 2732 отбасына азық-түліктей көмек берілсе, 361 жанұяға төсек-көрпе, 2351 үйдің киім-кешек қажеттіліктері өтелді. Ал, мамыр айынан бастап мекен-жайына байланысты 4 тамақ беру пункті бекітілді. Әрине, азық-түлік бір-ақ рет емес, апта сайын беріліп тұрды. Сонымен қатар, «Қызыл ай» қоғамы да бізбен байланысқа шығып, аудан тұрғындарына көмек көрсеткен болатын. Атап айтар болсақ, маусым-шілде айында бас-аяғы 1576 адамға қол ұшын созды.
- Еріктілер туралы айта кетсеңіз...
-Еріктілердің еңбегі ерен. Ала таңнан қара кешке дейін кірпік қақпай қызмет ету оңай емес. Оның ішінде ренжитін де, айқайлайтын да тұрғындар болды. Барлығына төзіп, қабағын шытпай, қиындықта қалған жерлестеріне мейірім көзімен қарай білу де ерлік. 150 еріктімен бастап, соңында 60 еріктімен қалдық. Ең жасы 7-сынып оқушысы Махамбет Жалғасұлы болса, ең үлкені 60 жастағы Қарлыға Қабдешова апайымыз еді. Еңбектеген баладан, еңкейген кәріге дейін ерікті болды, тіпті, өз отбасымда келінім мен кішкентай немеремнен басқасының бәрі қызмет етті. Қиын кезеңдер болғанымен, қызықты сәттер де кездесті. Теңіз қалашығында жатқан тұрғындардан түрлі ұсыныстар түсетін. Мысалы, «Гүлі бар қызыл халаттың 56-шы өлшемі» немесе тағы сол сияқты жүзіңе күлкі үйіретін сәттер болған. Етек-жеңін жиып, ел аяққа тұра бастағанда гуманитарлық көмек те саябырсып, біз де өз жұмысымызды аяқтадық. Қызмет еткен еріктілерге демеушілердің арқасында ақшалай сыйақы да берілді.
-Қандай қиындықтар кездесті?
-Жасыратыны жоқ, сол бір қиын кезеңде, қара халықтың емес, қара бастың қамын ойлағандар аз кездеспеді. Тіпті, бізге келе жатқан бір жүк көлік гуманитарлық көмекті қалтаға басқысы келгендер де болды. Ақша, көп көлемдегі азық-түлік, киім-кешек жүрген жерде адамның ниетінің бұзылатыны сөзсіз. Ілік іздегендер де көп еді. Әлеуметтік желі арқылы түрлі жаңсақ ақпарат таратып, жұмысымызға кедергі келтірмек болғандар да аз болмады. Алайда, Алланың және алаш жұртының алдындағы ақтығым ақыры жеңіп шықты. Бір қызығы, сол уақытта Құдай көкірек көзімді тойдырып қойғаны соншалық, алдымда толып жатырған дүниеге қызықпаппын. Тіпті, консервіленген еттің қалбырын гуманитарлық көмектен пайдаланбай, дүкеннен сатып алатын едім. Себебі, адамдардың аманаты мен үшін ақша мен дүниеден де жоғары тұрды.
- Қиын кезде бірге болған жерлестеріңізге қандай тілек айтар едіңіз?
-Қиын-қыстау кезеңде жұртымыздың жұдырықтай жұмыла білген ұйымшылдығының арқасында бүгінгі мамыражай күнге қайта келдік деп ойлаймын. Сол кезеңдердегі қиындыққа бейжай қарамай, қолындағы барын берген барша отандастарға алғысымызды айтамыз. Ел басына күн туғанда шетте қалмаған еріктілерге де ризашылығымды білдіремін. Бірлігіміз ажырамаса, әлі талай сынақтан сүрінбей өтеріміз хақ.
- Сұхбатыңызға рахмет. Еңбегіңізге жеміс, отбасыңызға амандық тілейміз!
Сұхбаттасқан Е.АЛТАЙҰЛЫ
