Өткен сәрсенбі күні аудандық мәдениет үйінде Құлсары қаласы әкімінің сайлауы болып өтті.

Оған үміткер ретінде екі азамат түскен болатын-ды. Олар қазіргі Жаңа Қаратон поселкесі мен Қосшағыл ауылының әкімдері Қаржау Шарғабаев пен Саян Баселовтер еді.

Аудандық сайлау комиссиясының төрайымы Зәуреш Қалмұханова дауыс беруге аудандық мәслихаттың 14 депутатының 13-і қатысып отырғандығын мәлім етті. Мұндай жағдайда заңға сәйкес сайлауды өткізуге толық негіз бар.

Еліміздің әнұраны шырқалып, комиссия төрайымы сайлаушыларға жергілікті әкімдерді сайлау туралы заңдылық талаптарын түсіндірді. Іле-шала халық қалаулылары арнайы тәртіппен өз дауыстарын берді.

Сайлау бюллетеньдері сол жерде депутаттардың көзінше саналды. Көп ұзамай комиссия төрайымы З.Қалмұханова сайлау қорытындысын жария етті. Дауыс берудің қорытындысымен 13 депутаттың 1-еуінің ғана үміткер С.Баселовті қолдағаны белгілі болды.

Халық қалаулыларының басым дауысына ие болған Қаржау Шарғабаев Құлсары қаласының әкімі болып сайланды.

Е.Қошақанов.