Қаншама ананы өлім аузынан арашалап, соншама баланың жарық дүниеге келуіне себепкер болған аға акушер Сәлима Өтешованың ел үшін жасаған ерен еңбегі ұмытылмақ емес. Оның 40 жылдық кәсіби еңбек жолында өз қолымен пайдаланған құрал-саймандарының Құлсары қаласындағы аудандық «Атамұра» музейінің төрінен табылуы – ақ халатты абзал жанға деген айрықша құрметтің белгісі болса керек.
Еңбек жолын 1968 жылы аудандық орталық аурухананың перзентхана бөлімшесінде бастап, ғибратты ғұмырын ана мен балаға арнаған акушердің өңір медицина саласының дамуына қосқан үлесі зор. Өз кәсібіне деген адалдықтың, сүйіспеншіліктің, асқан жауапкершіліктің арқасында бір салада табан аудармастан ұзақ жыл еңбек етіп, перзентхана бөлімшесінен зейнеткерлікке шыққан абзал жанның артында қаншама жақсы сөз, жылы естелік, қолжазбалары қалды. Уақытпен санаспай күні-түні төккен маңдай терінің нәтижесінде қол жеткізген жеңісті жетістіктері үшін алған марапаттары мен қызмет бабында пайдаланған медициналық құралдары – өскелең ұрпаққа ой саларлық дүниелер. Бүгінде олар мұражай төріне қойылды. Бұл жөнінде аға акушердің ұлы Абылай Қалымұлы:
- Анамның жетістігі мен медициналық құралдарын мұражайға тапсыру - мен үшін үлкен қуаныш. Бұл ұсынысты өткен жылдың қыркүйек айында жолдаған едім. Өтінішім жауапсыз қалмай, тілегім орындалды. Оның әр сөзі, әр заты, әр жетістігі – мен үшін баға жетпес байлық. Көзі тірісінде бізге жиі ақылын айтатын. Адал жүріп, адал еңбек етуімізді қалайтын. Анамның арына дақ түсірмей, атына кір келтірмеу – біздің міндетіміз. Бұл ретте қала әкімдігіне де барып, орталық көшелердегі жарнама тақталарына анам жөнінде ақпараттық фотосуретін шығаруға ұсыныс бердім,-дейді анасы жөнінде ой өрбітіп.
«Жақсының өзі өлсе де, сөзі өлмейді» демекші, акушердің көзі тірісінде жасаған еңбегі ұмыт қалмай, ол жуырда ғана денсаулық сақтау саласының дамуына қосқан үлесі мен мінсіз қызметі үшін «ҚР Денсаулық сақтау саласының еңбек сіңірген қызметкері» төсбелгісімен марапатталды. Астананың төрінде бұл құрметті атақ дәрігердің ұлы Абылай Қалымұлына табысталды.
«Атамұра» музейінің директоры Мұрат Қақпанбаевтың айтуынша, мұражай төріне қойылған заттардың ішінде Сәлима Өтешованың акушерка мамандығын растайтын дипломы, кезіндегі «Отан» республикалық саяси партиясы мүшелігіне өткендігі жөнінде куәлігі, «Ветеран труда» медалі мен куәлігі, әскери билеті, сондай-ақ акушер мамандығының біліктілігін жетілдіру курсында алған құжаттары, акушердің өзі пайдаланған медициналық науа, қысқыш, пинцет, бикс, сынапты термометр, шыны бөтелке, қолмен кеуде сорғысы (ручной грудной молокоотсос), хирургиялық ине, ағаш стетоскоп сынды басқа да заттары қойылды.
Иә, 20 мың баланың кіндік анасы атанған акушердің өмірі мен еңбек жолы – өскелең ұрпаққа өнеге. Жүзінен мейірім төгілген абзал жанның артында қалған мұрасын қастерлеп, ұлығылау өңірден Сәлима сынды білікті де мейірімді мамандардың шығуына септігін тигізері сөзсіз.
Д.ІЗБАСАРҚЫЗЫ
