Мемлекет басшысының «Түркістан» газетіне берген «Қазақстан жаңғырудың жаңа кезеңіне қадам басты» атты сұқбаты мен үшін елдің жүрегінен шыққан шынайы үн секілді әсер қалдырды. Бұл сұқбатта құрғақ дерек пен ресми тұжырымнан гөрі, уақыттың тынысын дөп басқан терең ой, болашаққа деген байыпты сенім сезіледі. Оқырман ретінде мен бұл сөздерден мемлекеттің бүгінгі беталысын ғана емес, ертеңгі бағытын да анық көргендей болдым.
Жаңғыру туралы айтылған ойлар мені өз өміріме, өз ұстанымдарыма үңілуге мәжбүр етті. Елдің өзгеруі заңдар мен бағдарламалардан басталғанымен, оның нақты нәтижесі қарапайым адамдардың күнделікті ісінен көрінеді деп ойлаймын. Мен үшін жаңғыру — өз ісіңе немқұрайлы қарамау, әділ болуға тырысу, қоғамға пайдаңды тигізуге ұмтылу. Егер әрқайсымыз осыны түсінсек, үлкен өзгерістердің де іргесі қаланар еді.
Бұл сұқбат менің Қазақстанның болашағына деген сенімімді күшейтті. Себебі онда жалған ұран емес, шынайы ой бар. Мен елімнің жаңа кезеңге қадам басқанына сырттай бақылаушы ретінде емес, сол жолға бірге түскен азамат ретінде қарағым келеді. Өзімнің шағын еңбегім, адал ниетім де сол жаңғырудың бір бөлшегі бола алатынына сенемін.
Жылыой ауданының жергілікті кәсіпкерлерді қолдау бөлімінің үйлестірушісі
Сәрсен Ерболов
