Алматыда орфандық (сирек кездесетін) аурулармен өмір сүріп жатқан қазақстандықтар туралы «Редкие люди» деректі фильмінің премьерасы өтті. Жобаны Канат Бейсекеевтің продакшн-студиясы «Такеда Қазақстан» компаниясының қолдауымен жүзеге асырды. Фильм сирек диагнозы бар науқастардың мәселелеріне қоғам назарын аударып, ашық диалог алаңына айналды.
Картина кейіпкерлері ауыр дертке қарамастан белсенді өмір сүріп келеді. Олардың қатарында өмір бойы фермент алмастыру терапиясын қабылдайтын әрі пациенттерге қолдау көрсететін қорды басқаратын Хантер синдромы бар Самат Рамазанов бар. Сондай-ақ фильмде гемофилиямен ауыратын баланың анасы, тұқым қуалайтын ангионевротикалық ісінуі бар әйел және миастениямен өмір сүретін музыканттың оқиғалары көрсетілген.
Фильмде Крон ауруымен күрескен, түсірілім аяқталғаннан кейін өмірден өткен Ардақ Дүсманбетовтің тарихына да ерекше орын берілген.
2024 жылдың соңындағы дерек бойынша, Қазақстанда сирек кездесетін аурулармен ауыратын шамамен 87 мың пациент дәрігерлердің бақылауында, олардың 21 мыңы — балалар.
«Біз үшін бастысы — диагнозды емес, адамның өзін көрсету. Бұл фильмде сирек аурулар туралы ғана емес, жалғыздық, қолдау және рух күші туралы ортақ тақырыптар қозғалады», — деді режиссер Канат Бейсекеев.
Компания туралы. «Такеда Қазақстан» — штаб-пәтері Жапонияда орналасқан Takeda жаһандық биофармацевтикалық компаниясының бөлімшесі. Компания гастроэнтерология және қабыну аурулары, сирек кездесетін аурулар, плазмалық терапия, онкология, неврология және вакциналар бағытында инновациялық препараттар әзірлейді және емге қолжетімділікті арттыруға бағытталған.
Takeda әлемнің 80-нен астам елінде жұмыс істейді, Қазақстанда 2013 жылдан бері қызмет етеді. Компания портфелінде 20-дан астам препарат бар, оның 10-ы — инновациялық әрі өмірлік маңызы бар дәрілер.
