Қазақстан Республикасының Экология және табиғи ресурстар министрі А. С. Қуантыров «Теңізшевройл» ЖШС Бас директоры Уильям Лакобимен кездесті. Кездесу барысында тараптар өндірістің қоршаған ортаға әсерін барынша азайту, табиғи ресурстарды тиімді пайдалану және озық технологияларды енгізу мәселелерін талқылады.
Компанияның мәліметінше, ТШО қоршаған ортаны қорғау бағытындағы жобаларға тұрақты түрде инвестиция салып келеді. 2000 жылдан бері бұл мақсатқа салынған инвестиция көлемі 3,2 млрд АҚШ долларынан асты.
Компания экологиялық көрсеткіштер бойынша оң динамиканы атап өтеді. Атап айтқанда, 2000 жылдан 2026 жылдың бірінші жартыжылдығына дейін өндірілген мұнайдың бір тоннасына шаққандағы атмосфераға шығарылған шығарындылар көлемі 78%-ға төмендеген.
Газды тиімді пайдалану бағытында да айтарлықтай нәтижелерге қол жеткізілді. 2026 жылдың бірінші жартыжылдығында ТШО өндірген газды кәдеге жарату деңгейі 99,3%-ды құрады.
Суды ұтымды пайдалану мәселесіне де ерекше мән беріліп отыр. 2026 жылдың алғашқы алты айында кәсіпорында суды қайта пайдалану деңгейі 51%-ға жетті. Сонымен қатар, ТШО тұрмыстық ағын суларды кәдеге жарату, оларды өндірістік мақсатта тазарту және қайта пайдалану арқылы су ресурстарын үнемдеуге бағытталған шараларды жалғастыруда.
Қалдықтарды басқару бағытындағы жұмыстар да жалғасуда. Қазіргі таңда ТШО қалдықтардың 30-дан астам түрін қайта өңдеуге жібереді. 2026 жылдың бірінші жартыжылдығында қалдықтарды қайта өңдеудің жалпы үлесі 63%-ға жетті.
Министр А. С. Қуантыров ТШО елдегі ірі жер қойнауын пайдаланушылардың бірі ретінде қоршаған ортаны қорғау, мемлекеттік органдармен өзара іс-қимыл жасау және сындарлы диалог орнату бағыттарында басқа кәсіпорындарға үлгі болуы қажет екенін атап өтті.
Кездесу соңында министр Қазақстан Республикасының экологиялық заңнамасы талаптарын мүлтіксіз сақтаудың маңыздылығын атап өтті.
Осылайша, ТШО-ның экологиялық саясаты өндірістің қоршаған ортаға әсерін біртіндеп азайтуға, су мен газ ресурстарын тиімді пайдалануға, сондай-ақ қалдықтарды қайта өңдеу көлемін арттыруға бағытталған.
